9
Crónica del moro Rasis de Ahmad ibn Muhammad al-Razi
Historia de la España árabe
11

10. Et quando la villa fué presa, et Muça de ella fué señor, dexó en ella homes que la guardassen, et fué á cercar á Sevilla. Et hauia en ella mucha buena gente et en Sevilla moravan los sesudos clérigos, et los buenos cavalleros, et los sotiles menestriles. Et en Sevilla moravan tales tres mill homes, que todo el mundo si viniera sobre ellos, serian buenos, mientras huviessen las almas en los cuerpos. Et quando sopieron que los venían cercar et sopieron que si en la mano los cojiesse, que les costaría los cuerpos, et que por otra sentencia non passarian, juramentáronse todos: et ovieron su consejo que se defendiessen. Et bastecieron mui bien á Sevilla, et dixeron á cada uno qual puerta guardassen, et á qual hauian de estar; et pararon su fazienda tan bien, que marauilla era, et dejáronse estar quedos. Et un dia quando el alua quería quebrar, armáronse en Sevilla mill homes á cauallo, et tomaron su consejo que fuessen á ferir en la hueste, que fiçiessen quanto pudiessen, ante que los de la hueste se pudiessen acojer á las armas. Et desi que fuessen á Veja et allegassen la mas gente que pudiessen tan encubiertamente, que no lo sintiessen los de la hueste et ellos feririan de la una parte de la hueste et los de la villa de la otra et que por esta guisa los vencerían. Et como lo dixeron,ficieronIo ansí, ca salieron sin sospecha, et fiçieron grant daño en la hueste de Muça, et acogiéronse sin su daño á su camino, et fueron su carrera, et ante de tres dias, sopieron los de la hueste toda su fazienda de los de la villa, et non quisieron más yacer sobre ella, mas fuéronse á cercar á Merida.