Moro Rasis: 16
16. Parte el termino de Bretania con el de Osca[1], et Osca yaze al sol Levante de Zaragoza et al sol Levante de Cordova. Et Osca es mui noble cibdad, et mui grande et mui antigua, et mui fermossa et muy bien assentada. Et ha y tierra mucha et buena , et cerca della corre un rrio que ha nombre Beza[2]. Et este rrio es de agua delgada en toda sazón; et en su termino ha villas bien castelladas, de las cuales es la una Solge et otro castillo á que llaman Ayxaxe, et otro castillo que llaman Cinete, et otro castillo que llaman Ribas, et otro que ha nombre Tolia. Et Tolia yaze cerca de la sierra de Aragón; et Aragón es mui nombrada sierra entre los christianos. Et en ella yazen dos castillos mui buenos, et el uno ha nombre Sen, et el otro Men, et yazen en dos pennas que son en cima de la sierra de Aragón. Et corre por entre ellos un rrio que llaman de Fluime[3], et es so el señorio de Osca. Et yaze y un castillo que ha nombre la Boca (13), et otro que ha nombre Bacin. Et de las sierras que nos fallamos en Espania et lugares nombrados en fortaleza los mas son en aquella sierra que se ayunta con monte Aragón, que ha nombre Montenegro, et non lo podra passar omen á caballo que ande bien en menos de tres dias. Et la sierra de Gavera[4] es mui fuerte sierra á maravilla, et entra en la mar. Et de Osca á Zaragoza ha y cinquenta migeros.