Moro Rasis: 17
17. Parte el termino de Osca con el de Tudela; et Tudela yaze al sol Levante de Cordova, et á Occidente de Osca: et todo el mundo se maravilla por la bondad del termino de Tudela, que el su pan no ha par entre los otros; que ha y muchas villas, et muchas huertas, et buenas tierras et crianzas; et los frutales dan tan sabrosas frutas que non vos las podria omen contar nin decir, et las sus aguas entran en el rio de Ebro. Et á la puerta de la villa está la puente de sobre el rrio Ebro, et so los arcos de la puente están las azenias que por ninguna guisa nunca les podran vedar el agua. Et esta villa fué fundada por mandado de Alhequim, et fundóla Obricon el nombrado, que fué fijo de Zenon; et Zenon fué Almoxarife de Zaragoza et de todas las sus villas. Et la cibdad de Zaragoza fué mui grand tiempo cámara de los Almojarifes, et fué escogida de los guerreadores. Et quando combatían la cibdad de Zaragoza, y se combatían todos los alcalles et Almogávares, et para si la escogían. Abdalla fijo de Osmen, al que llamaban Abí usmen, la ganó por su espada; et y moraua mas que en otras villas et y aduxeron todas las tiendas de Narbona et de Barcelona. Et por la bondad de la gente de Tudela et por el su grand sennorio convenió á los de Tarasona que fuesen so el sennorio de Tudela. Et derredor della ha muchas villas et muchos castillos et mui fuertes de los quales es el uno Arrayt. Et quando Espania de moros era, era Arrayt su escudo contra los christianos. Arrayt es mui antigua villa. Et ha y una villa que llaman Calahorra et otra que ha nombre Najara et otra que ha nombre Locayra que es castillo mui fuerte et yaze en un rrio entre dos sierras que lo cubren. Et de Tudela á Zaragoza ha cinquenta migeros. Et de Calahorra á Tudela ha veinte et cinco migeros, et de Tudela á Najara ha sesenta migeros. Et de Bucaria á Tudela ha quince migeros, et de Arrayt á Tudela ha cinquenta et dos migeros. Et de Arrayt á Zaragoza ha ochenta et dos migeros. Et de Tudela á Zaragoza ha catorce migeros.