Moro Rasis: 9
9. Parte el termino de Elibera con el de Jaén. Et Jaén yaze al Septentrión de Elibera, do es contra Oriente de Cordova. Et Jaen ayunta en si muchas bondades, et a y muchos arboles, et muchos regantíos et fuentes muchas, et mui buenas. Et el termino de Jaen semeja al de Algecira. Et Jaen a villas et castillos que le obedescen, de los cuales el uno es Adira, que agora llaman Erriba. Et en Erriba á muchas fuentes corrientes, et nasçen y aguas vedadas, que las non osar tomar. Et la otra es Montija[1], que es cibdad mui antigua, et mui fuerte, et mui alta, et yasçe sobre buenas vegas. Et la otra es Ubeda, que antes llamaban Obdete de los Alábares, et es mui buena villa, et sabrosa, ella et su termino. Et la otra es Baeza, que es una de las buenas cibdades. Et Baeza yaze sobre buena vega plantada de muchos buenos arboles, et a muchos bienes, et fazen y mui buenas telas de pannos de seda mui nombrados, que son llamados tapetes. Et a y otro logar a que llaman Lecho seco, et a y en él tanta de madera que abondaría a toda Espania. Et la otra es Remon, et Remon es tierra de gran camino. Et entre la villa de Remon et la villa que llaman Vedaluba a y una vega en que nasce mucho pelitre. Et Remon a lugares mui fuertes et grandes sierras et mui altas: et a y un castillo á que llaman Tastad, et es tan alto que non le pueden poner escalas en ninguna manera, et non vos podria omen contar la su alteza del su muro. Et en esta sierra yaze el castillo de Oxnoet el de Margaría et el de Montanno. Et sale y la sierra de Castro, la que llega á la cibdad de Jaen, et es mui poderossa en fortaleça, et della sale la sierra de Tex que es mui alta. Et Tex fué una cibdad mui antigua, et agora fallan y rastros antiguos, et de la cibdad de Jaén á la de Cordova ha cinquenta migeros.
- ↑ La Guardia.