Moro Rasis: 10
10. Parte el termino de Jaén con el de Tudemir. Et Tudemir yace al sol levante de Cordova. Et Tudemir es mui presciado lugar, et de muy buenos arboles. Et toda su tierra riega el rrio, assi como faze el rio de Nil en la tierra de promission. Et a buena propiedad de tierra natural, que a y veneros de que sale mucha plata. Et Tudemir[1] ayuntó en si todas las bondades de la mar et de la tierra, et a y buenos campos et buenas villas et castillos, et mui defendidos, de los quales es el uno Lorca, et el otro Morata[2], et el otro Auriela[3], que es mui antiguo lugar, en que moraron los antiguos por luengo tiempo. Et el otro es Alicant; et Alicant yaze en la sierra de Benalcatil, et de ella salen muchas otras sierras, en que fiçieron muchas villas buenas, et en que labravan muchas buenas telas de pannos de seda: et los que y moravan eran mui sotiles en sus obras. Et una de las cibdades [de Tudemir] es Cartagena á que llamavan los moros Alquerone, et otro es un puerto á que llaman de Uca, et es mui bueno et muy antiguo. Et de Tudemir á Cordova a y andadura de siete dias de omes á cavallo, et catorze á huestes.