Moro Rasis: 21
21. Parte el termino de Baruja con el de Medinaceli. Et Medinaceli es mui fuerte villa, et mui buena , et mui viciosa, et mui fermossa; et ha y muchas sennales antiguas, que non se pueden desfazer. Et yaze en una tierra et en un logar mui sabroso para el cuerpo del omen. Et Medinaceli es una de las cibdades que Taríc el fijo de Nazayr destruyó; et después á tiempo pobláronla los moros et moraron en ella. Et en su termino ha un castillo, et del uno al otro ha mui marauillosas lavores, et non a y en Espania tales et están en mui buen llano.