Página:Las siete partidas del rey Don Alfonso el Sabio (1807).djvu/225

153

TIT. III. DE LOS ALGUAZILES E DE LOS MERINOS &C.

LEY VI.

Que pena deven aver los alguaziles e los merinos, que non guardan lo que en esta ley dize.

Los alguaziles, e los merinos, e los juezes, e las justicias que son puestos para conplir la justicia de fecho en las ciudades e en las villas, asi como dixiemos que an de guardar muchas cosas, deven guardar las tierras, e los logares ó ellos fueren, de robos, e de fuerzas, e de furtos, e de peleas, e de feridas, e de armas, o de otra manera qualquier que sea, o de muertes de omes, o de fuerzas de mugieres, e de quebrantamientos de eglesias, e de casas e de caminos. E deven guardar otrosi, que non anden y seellos falsos de rey, nin de otri, nin cartas, nin moneda, nin los metales otrosi, que non los falsen de ninguna manera. E deven guardar que los derechos del rey nin sus rendas, non se pierdan nin se minguen en ninguna manera por su culpa dellos, nin metan ningun ome en presion, a menos de mandado de aquel que a poder de judgar en aquella tierra. E deven guardar, que non se achaquen a ninguno, demandandol cosa alguna sin derecho por razon de levar algo dél, e que non traya consigo omes malfechores, nin mal enfamados, e que tomen algo de las mugieres malas por razon de consentirlas que fagan nemiga de sus cuerpos, ca esto es grant pecado contra Dios, e grant malestanza quanto al mundo, e non deve seer fecho en ninguna manera. E otrosi, deve guardar que quando omes estranos ovieren a prender, que non lo fagan tan bravamiente como a los de la tierra, que son mas conoscidos, e an mas amigos que les ayuden a anparar sus derechos, e saben mas las costumbres de las tierras. Onde qualquier destos que dixiemos, que non guardase las cosas que esta ley manda, pues que es puesto para guardarlas, mandamos, que pierda aquel lugar que tiene, e todo el daño que recebiere por su culpa en estas cosas sobredichas, non lo queriendo vedar nin escarmentar, pechelo todo doblado a aquellos que el mal prisieren. E si prisieren como non deven, o metieren alguno a turmento, aya tal pena el que lo feziere como dize en la sesta ley deste titulo. Mas el que matare sin derecho, non lo faziendo segunt las leyes deste libro, mandamos , que muera por ello.