Página:Las siete partidas del rey Don Alfonso el Sabio (1807).djvu/179

Esta página ha sido corregida
107
TIT. VII. COMO DEVEN PARTIR LO QUE SE GANA &C

do e aducho alli ô él fuere, e deve el rey aver en su parte el quinto de todo quanto y oviere. E demas, si preso fuere tomado en tal guerra como esta, o en otra de qualmanera quier que sea, que vala mill mrs., o dende arriba, o que sea alcayade de villa o de castiello, o de alguna fortaleza que deve seer del rey, dando por el ciento mrs. a aquel que lo ganare. E tanbien estos ciento mrs., como todo lo al que y fuere ganado, devenlo adozir todo a monton, e sacado el quinto para el rey, asi como dicho avemos, de lo al deven conprir las menguas, e refazer los daños, e partir[1] segunt diremos adelante. Pero si tal preso, como dixiemos, sacase alguno de almoneda ol copiese en su parte, deve seer del rey, dando por él tanto como desuso diz.

LEY II.
Como deven fazer de lo que ganaren quando entraren por fuerza villa, o castiello.

 Por derecho tenemos, que quando entraren villa o castiello, o otro logar por fuerza, non se paren a robar ninguna cosa fasta que el fecho acaben. E esto dezimos porque muchas vezes fue, e podrie seer, que por pararse a robar entrando por las casas, cobravan los enemigos, e porque los fallavan esparzidos, matavanlos e echavanlos de aquel logar, que era como ganado, e fazien gelo perder. E sin esto venie ende otro mal, que algunas vegadas sobre aquello que robavan matavanse unos a otros, onde crecie esfuerzo a los enemigos del daño que ellos se fazien. E por ende dezimos qu el que desta guisa robase, farie tres yerros. El primero faze abolleza en querer ante robar que vencer los enemigos. El segundo metese por malo e por ladron en robar ante que deve, e en sazon que los otros estan en priesa, e non lo pueden saber, porque semeja que a sabor de lo encobrir. El tercero que es peor que todo lo al, que da carrera a los otros para fazer el mal que el faz, porque podrien caer en aleve si aquel fecho non se acabase por tal culpa. Onde mandamos, que qui tal cosa fiziere, que muera por ello. Mas esto es el derecho, que despues que el lugar fuere ganado, que aduga cada uno lo que ganare a monton, e den al rey si fuere y su quinto, segunt dixiemos en esta otra ley, e partan ellos lo al como en otra cavalgada.

Tomo I
O 2
 
  1. lo que quedare, 2.º cod.