desonral feziere en prenderle[1] mandamos, que nuncal pueda seer demandada dél, nin de otro ninguno. Pero si por aquel derraniar fuese y muerto o ferido el cabdiello, tenemos por derecho que pierda quanto que oviere[2].
De los otros que derramaren de la hueste teniendo el rey cercada villa, o castiello, o fortaleza, dezimos que deven aver grant pena porque podrié ende acaescer los males, que dixiemos en la ley ante desta. E demas que los enemigos podrien prender tal esfuerzo porque el rey non podrie ganar aquel logar, de que podiera seer heredado, e en que podiera heredar a ellos, e a los otros sus vasallos. E por ende dezimos que faze aleve. E si fuere rico ome, deve perder amor del rey, e la meatad de quanto que oviere, e sea echado del regno. E los que derramaren con él, si sus vasallos fueren, pierdan quanto que ally troxieren, e sean echados del regno. E si otros cavalleros derramaren, sean metidos en presión desonradamiente, e pierdan lo que ally troxieren, e de todo lo al que ovieren la meatad. E si por aquel derramamiento fuese el rey muerto o ferido, aya tal pena el que derraniase, como dize en la ley ante desta. Eso mismo dezimos si otro su señor o su cabdiello fuere y muerto o ferido.
Quando alguno derrania seyendo las azes paradas para batalla, o para fazienda, o para lid, este dezimos que faze mayor mal, que ninguno de los otros que dixiemos. Ca como quier que faga mal el que derrania, quando la hueste pasa ante algun logar ô sean los enemigos, o teniendo cercada villa o castiello, o otro lugar ô ellos yagan, enpero porque el esfuerzo es mayor de los de fuera, non mete tanto en aventura fecho de rey o de señor, como el que derrania seyendo las azes paradas e yendo unos contra otros, ô semeia el fecho mas comunal, e porque podrie caer mas ayna su señor en peligro de muerte, o de presion, o de desonra. E sin todo esto faze grant aboleza veyendo los suyos yrse matar con los enemigos e
