quier ó viesen que fuese meester. E otrosi deven acorrer a su seña, e a su pendon. Ca todo esto atañe al rey mismo e al regno. Otrosi deven acorrer si algunos quisiesen y fazer mal, o cercasen villa, o castiello, o se alzasen en el regno, o feziesen y otro daño. E estos acorros deven a fazer asi, como diremos de cada uno dellos e alli do conviene.
De las quatro cosas que dudemos en las leyes ante desta, avemos ya fablado, sin que non pueden seer guardados e onrados conplidamiente el rey, nin su regno. Agora queremos dezir de las huestes e de las guerras porque razon se deven a fazer, e mostrar en quantas maneras son, e el bien que nasce dellas. E dezimos que se fazen por estas dos razones, o por tomar venganza del mal ya fecho, o por destorvar el mal que se podrie fazer. E cada una destas se departe en otras dos maneras: ca el mal que es ya pasado, o el que podrie seer, o es contra Dios o es contra los omes, asi como en sus personas o en sus cosas. Onde por tomar venganza del mal que es ya fecho contra Dios e la fe, e por destorvar lo que se podrie fazer, devemos todos guerrear contra herejes, e con moros, e con todos los otros que son enemigos de santa eglesia, o que non son de nuestra fe. Otrosi para vengar e destorvar el mal que es ya fecho, o que se podrie fazer contra los omes e sus cosas, devemos guerrear con los soberviosos que nos fezieren mal, o que nos lo quieren fazer, o que nos tomaron lo nuestro, o nos lo quieren tomar o enbargar nuestro derecho. E porque guerreando ganamos paz, porque semeja grant maravilla[2] paz nos mueve para todas estas maneras de guerra, e de hueste, maguer que semeja estraña cosa de ganarse paz por guerra, pero non podemos estar que non tangamos destas quatro cosas que dixiemos, ya porque todo el fecho de las huestes salle dellas. Ca los que las huestes e las guerras fazen, o vienen a ellas llamandolos, o van a ellas enbiandolos, o estan en ellas mandando gelo, o acorren por si ó menester es. Mas agora queremos dezir en quantas maneras se deven fazer las huestes.
