De los que en batalla ponen dezimos que deven y estar asi como les el cabdiello mandare. Pero el cabdiello deve esto fazer con conseio de los mas sabidores de armas[1] que fueren en el logar. E esto mismo dezimos en fazienda, o en lid, o en conbatir villa, o castiello, o otro logar, o en robar el lugar que fuere cercado, o en tener carreras de noche, o en guardar cavas, o engeños, o otra cosa qualquier que desta guisa sea. Onde dezimos que qualquier que non estudiese en estos logares sobre dichos ól mandase seer el rey o aquel que fuese y en su lugar, aya tal pena como si derraiase.
Las tres maneras avemos dichas de como deven fazer los vasallos lo que el rey les mandare, asi como venir quando los él llamare, o de yr ó los enbiare, o de estar ó los posiere. Agora queremos fablar de la quarta que es de como deven acorrer ó fuer mester, maguer el rey non los llamare. E esto dezimos que deven fazer por dos cosas. La una por naturaleza e por el señorío que a el rey sobrellos[2] . E la otra por la naturaleza que ellos an en el regno. E esta naturaleza puede seer en muchas maneras, asi como por seer y nascido[3], asi como por heredamiento quel venga de padre, o de su linage, o de parte de su mugier, o si porfijó algún natural de la tierra, o a otro estrano, o por conpra, o por donadio, o por moranza que faga y de dos años conplidos, o dende arriba, o si es siervo el aforran en aquella tierra. Onde por todas estas razones son tenudos de acorrer o meester fuere. E este acorrer dezimos que es primeramiente a su cuerpo del rey, asi como si los enemigos
veniesen a darle batalla, e [4]dentro en la batalla sil derribasen ol feriesen, ol prisiesen, ol viesen entre sus enemigos, o sil matasen el cavallo. E esto mismo dezimos que deven á fazer en otro logar qual-