Página:Las siete partidas del rey Don Alfonso el Sabio (1807).djvu/121

Esta página ha sido corregida
49
TIT. XIII. COMO DEVEN ONRAR LOS OMES LEGOS DE CASA DEL REY.

ende mandamos que qualquier que desonrase alguno dellos ol feriese ol matase, que aya tal pena como si lo feziese al mayordomo.

LEY IV.
Como deven seer onrados e guardados los merinos del rey, e que pena deve aver qui los matase ó los desonrase.

Merino mayor dezimos que tanto quiere dezir como el ome mayor de la tierra para fazer justicia, e emendar las cosas mal fechas del rey en ayuso. E pues que el rey le faz grant onra en le dar tan grant logar, derecho es que los otros del regno que lo onren. Onde qualquier que lo desonrase de desonra que non fuese ferida, mandamos quel peche quinientos sueldos. E si el fijo mayor del rey el que a de seer heredero o qualquier de los otros fijos del rey lo ferier o lo matar, aya tal pena como dixiemos en la ley de los capellanes mayores. E si otro fijo del rey que non fuese de mugier a bendecion lo ferier de cual manera quier o lo matare, aya tal pena como si lo feziese otro rico ome. E si rico ome lo ferier de pie o mano de guisa que non pierda mienbro, pierda la tierra qne tiene del rey e sea echado del regno, e aya el rey de lo suyo quinientos mrs., e el ferido quinientos mrs. E si lo ferier de arma, pierda la tierra e sea echado del regno, e aya el rey de lo suyo dos mill mrs., e el ferido dos mill mrs. E si de aquella ferida perdiere mienbro o de ferida quel de de pie o de mano, peche mill mrs. al rey e mill al ferido, e pierda la tierra que tiene del rey, e sea echado del regno, e si lo matare muera por ello. E si el rey non lo podiere aver, pierda quanto que oviere e sea del rey, e el cuerpo quando aver lo podiere esté a merced del rey segunt el toviere por derecho. E si otro ome lo ferier de pie o de mano de que non pierda mienbro, peche mill mrs. al rey e mill al ferido, e echelo de tierra. E si non ovier de que los peche pierda la mano o el pie con que lo ferió. E si lo ferier de arma pierda la mano. E si de aquella ferida o de otra quel faga de pie o de mano perdiere mienbro, pierda mas desto la meatad de lo que oviere. E si lo matare muera por ello, e pierda cuanto que oviere e sea del rey.

LEY V.
Como deve seer onrado e guardado el alguacil de casa del rey , e que pena debe aver qui los matase o los desonrase.

Asi como el merino mayor es puesto para guardar la tierra e

Tomo I
G