tas, nin fazer espolonada sin mandado del alcayde. Ca si lo feziere e el castiello se perdiere, son traydores por que fezieron cosas por que su señor e su alcayde que tenien en logar de señor fuese traydor, e su rey fuese desheredado daquel logar. Otrosi el alcayde non lo deve fazer e si lo[1] feziera maguer muera ó sea preso en aquella salida, si el castiello se[2] perdiere es traydor. Ca pues que es dado por guardar e defender el castiello, non deve salir ende por ninguna guisa sin mandamiento del rey, e el mandamiento que sea cierto e que se pueda provar por testigos. Otrosi dezimos que ninguno non deve furadar el muro, nin derribar del sin mandado del alcayde, fueras ende si en conbatiendo se derribare alguna poca cosa para tomar con que se defienda, de guisa que se non pueda perder el castiello por aquello que derribare. Ca si asi lo feziere non le está mal. E como quier que defendemos que ninguno non deve mal meter, nin perder las armas del almazen nin el conducho, si en defendiendo el castiello lo despendiere o perdiere las armas otrosi nol está mal. Ca qualquier que de otra guisa lo feziese si el castiello se perdiese es traydor. Mas dezimos que si portiello y oviese fecho o cava por ó los otros cuydan entrar el castiello, que se deve parar el alcayde en el logar que entendiere que mas cunplirá su defendemiento, e ali deve estar fasta que sea preso o por fuerza muerto. E si asi non lo feziere, e por su culpa se perdiere, es traydor e deve aver tal pena como qui por su culpa pierde castiello de su señor. E si en yendo del un castiello al otro acorrer allí do entendiere que es mas mester, fuere en la carrera preso o muerto , e si el castiello se perdiere non vale por ello menos dexando tal ome como manda la ley.
De los de fuera dezimos que si la villa o castiello o fortaleza fuere cercada, que los vasallos del rey e sus naturales deven acorrer e defenderlo metiendose dentro con armas e con conducho cada uno lo meior que podiere, e sinon deven guerrear a los enemigos e fazerles quanto mal podieren, e esto faziendo ayudan a defender el castiello. Ca el natural del rey, maguer non sea su vasallo, mucho se
deve doler de su desheredamiento, e es tenido de lo defender quan-
