Moro Rasis: 33
33. Parle el termino de Coimbra con el de Exitania. Et Exitania yaze al Levante de Coimbra et al Poniente de Cordoua, et es mui antigua cibdat et yaze sobre el rrio de Tajo, et es un logar mui fuerte et complido, et bueno de pan et de vinnas et de caza et de pescado, et es tierra mui deleitosa. Et ha en su termino muchos castellos et muy fuertes et mui sanos para la vida de los omes, de los quales es el uno Montesanto que es mui fuerte á maravella, et el otro es Araches et el otro es Ucalvan que yaze en somo de una penna mui alta et mui fuerte; et el otro es Alcántara que es mui buena villa. Et esta Alcántara tiene una puente sobre el rrio de Tajo que nunca ome oyó fablar de otra tal puente, nin home que vos lo pudiesse contar si visto non la oviesse. Et es mui buena tierra de crianzas et de caza et de colmenares. Et de Exitania á Cordoua ha trescientos et ochenta migeros.