Moro Rasis: 27
27. Parte el termino de Alleris[1] con el llano de las bellotas. Et Alleris yaze contra el sol Levante de Cordoua, et al Septentrión. Et Alleris es villa en que morauan los barbaros[2]. Et en su termino ha un llano mui fermoso et mui bueno que es cercado de los montes, que lo fazen mui fermoso et mui bueno. Et en su termino yaze el venero de que sacan el asogue[3], et de allí lo llevan á todas las partes del mundo; non lo ha sinon alli; et sacan y mucho bermellón el mui bueno, et non lo saben tan bueno sinon aquel que sacan de ultramar. Et lo demás desta tierra no ha y otros arboles sinon encinas, et por esso la llaman el llano de las vellotas, et son mas dulces que quantas ha en Espanya. Et ha y una cibdat á que llaman Luca, que es mui antigua cibdat. Et y yaze al sol Poniente del llano de las vellotas otra cibdat á que llaman la Constantina. Et Constantina yaze al Septentrión et al Poniente de Cordoua, un poco desuiada contra Oriente. Et en su termino ha grant tierra de pan et de vinnas. Et a y muchas naturas de arboles, et los mas son castannos, et cerezos, et avellanos, et a y piedras de marmoles blancas, et mui claras, et muchas aguas en que muelen muchas acennas. Et esta villa ha muchos veneros de fierro mas que en otra que omen sepa.