Moro Rasis: 25
25. Parte el término de Çorita con el de Alfar. Et la ciudad de alfar que agora llaman Aguadalfaxar[1], yaze contra el septentrión de Cordoua, un poco desviada. Et yaze sobre un rrio á que dicen Aguadalfaxar. Et Aguadalfaxar es mui buena villa et mui prouechosa para sus moradores, que a y mui muchos arboles de muchas naturas, et de pan et de grandes vegas. Et en su termino a y castillos et villas, de los quales es el uno el castillo de Mongerid[2], et otro que llaman Capatan que es el mas fuerte castillo que ha en todo el su termino. Et quando los moros ovieron á Espania, deste castillo ficieron atalaya contra los christianos de fuera de Espania, quando ellos ovieron miedo. Et parte el su termino por el monte[3] que parte las Espanias, et ha y mui buenas tierras de caça et de montes et de riberas.