Milagro XVI - El niño judío

Milagros de Nuestra Señora de Gonzalo de Berceo
Milagro XVI - El niño judío


Enna villa de Borges una çibdat estranna
Cuntió en essi tiempo una buena hazanna:
Sonada es en Françia, si faz en Alemanna,
Bien es de los miraclos semeiant e calanna.


Un monge la escrípso omne bien verdadero,
De Sant Miguel era de la Clusa claustero:
Era en essi tiempo en Borges ostalero,
Peidro era su nomne, so ende bien çertero.


Tenie en essa villa, ca era menester,
Un clerigo escuela de cantar e leer:
Tenie muchos criados a letras aprender,
Fijos de bonos omnes que querien mas valer.


Venie un iudezno natural del logar
Por sabor de los ninnos por con ellos iogar:
Acogienlo los otros, non li façien pesar,
Avien con él todos sabor de deportar.


En el dia de Pascua domingo grant mannana,
Quando van corpus Domini prender la yent christiana,
Prísol al iudezno de comulgar grant gana,
Comulgó con los otros el cordero sin lana.


Mientre que comulgaban a muy grant presura,
El ninno iudezno alzó la catadura,
Vío sobrel altar una bella figura,
Una fermosa duenna con genta creatura.


Vío que esta duenna que posada estaba,
A grandes e a chicos ella los comulgaba:
Pagóse della mucho quanto mas la cataba,
De la su fermosura mas se enamoraba.


Yssio de la eglesia alegre e pagado,
Fué luego a su casa commo era vezado,
Menazólo el padre porque avie tardado,
Que mereçiente era de seer fostigado.


Padre, dixo el ninno, non vos negaré nada,
Ca con los christianiellos fui grant madurgada,
Con ellos odi missa rica-mientre cantada,
E comulgué con ellos de la ostia sagrada.


Pesoli esto mucho al mal aventurado,
Commo si lo toviesse muerto o degollado:
Non sabia Con grant ira que fer el diablado,
Façie figuras malas commo demoniado.


Avie dentro en cassa esti can traydor
Un forno grant e fiero que façie grant pavor:
Fizolo ençender el locco peccador ,
De guisa que echaba sobeio grant calor.


Príso esti ninnuelo el falso descreido
Asin commo estaba calzado e vestido:
Dió con él en el fuego brava-ment ençendido:
Mal venga a tal padre que tal façe a fijo.


Methió la madre voçes a grandes carpellidas,
Tenie con sus onçeias las massiellas rompidas,
Ovo muchas de yentes en un rato venidas,
De tan fiera queja estaban estordidas.


El fuego porque bravo, fue de grant cosiment,
Non li nuçió nin punto, mostrolis buen talent,
El ninnuelo del fuego estorçió bien gent,
Fizo un grant miraclo el Rey omnipotent.


Iaçie en paz el ninno en media la fornaz,
En brazos de su madre non iazrie mas en paz,
Non preçiaba el fuego mas que a un rapaz,
Cal façie la GlorioSa companna e solaz.


Issio de la foguera sin toda lission,
Non sintió calentura mas que otra sazón,
Non priso nulla tacha, nulla tribulaçion.
Ca pusiera en elli DioS la su bendiçion.


Preguntaronli todos iudios e christianos:
Commo podio vençer fuegos tan sobrazanos,
Quando él non mandaba los piedes nin las mannos?
Qui lo cabtenie entro ficiesselos certanos.


Recudiolis el ninno palabra sennalada:
Laduenna que estaba enna siella orada,
Con su fijo en brazos sobrel altar posada,
Essa me defendie, que non sintie nada.


Entendieron que era Sancta Maria esta
Que lo defendió ella de tan fiera tempesta:
Cantaron grandes laudes, fiçieron rica festa,
Methieron esti miraclo entre la otra gesta.


Prisieron al iudio, al falsso desleal,
Al que a su fijuelo fiçiera tan grant mal,
Legaronli las manos con un fuerte dogal,
Dieron con elli entro en el fuego cabdal.


Quanto contarie omne poccos de pipiones,
En tanto fo tornado çeniza e carbones:
Non diçien por su alma salmos nin oraçiones,
Mas diçien denosteos e grandes maldiçiones.


Diçienli mal ofiçio, façienli mala ofrenda,
Diçien por pater noster, qual fizo. atal prenda:
De la comunicanda domni Dios nos defenda,
Por al diablo sea tan maleita renda.


Tal es Sancta Maria que es de graçia plena:
Por serviçio da gloria, por deserviçio pena,
A los bonos da trigo, a los malos avena,
Los unos van en gloria, los otros en cadena.


Qui serviçio li façe, es de buena ventura,
Quil fizo deserviçio, naçió en ora dura:
Los unos ganan graçia, e los otros rencura,
A bonos e a malos so fecho los mestura.


Los que tuerto ti tienen o que la desirvieron,
Della merçed ganaron, si bien gela pidieron:
Nunqua repoió ella a los que la quisieron,
Nin lis dió en refierta el mal que li fiçieron.


Por probar esta cosa que dicha vos avemos,
Digamos un exiemplo fermoso que leemos:
Quando fuere contado, meior lo creeremos,
De buscarli pesar mas nos aguardaremos.